Шавкат Муҳаммад: Алдасам , Эйфель устимга қуласин! (ҳажв)

Ишдан қайтаётганда доим вақтни ўлдириш учун мобил телефонда интернет оламига шўнғийман. Жуда қулай, доим қўл остида. Икки кун интернетимга дам олиш бергандим, почтага келган хатлар анча-мунчаси йиғилиб қолган экан, бир бошдан "ейишни" бошладим. Хатда матнга қўйилган ҳавола ( линклар ) ортида қувиб гадой топмас сайтдан чиқиб қолдим.

Жарангдор сарлавҳали мақола эътиборимни тортди. Биласиз, сарлавҳада гап катта, бир қарашда одамни ўзига боғлаб қўядиган сарлавҳа топишам катта санъат. Яхши мақоланинг ҳидини сезиб курсорни сарлавҳа устига қўйиб ENTERлатвордим.
Мақола ярмига етганимда мия иккинчи "поток"ни ишга тушириб,  юқори тезликда ишлай бошлади.Сизни билмадим, менда ноёброқ қобилият бор.

 Бир пайтнинг ўзида бир қанча иш бажара оламан. Дейлик, овқатланиб ўтирганда мусиқа тинглаб, китоб ўқийман, хотиннинг кундалик терговларига жавоб бераман, ўнг оёғимни ликиллатиб,  чап қўлим билан елкамни қашийман.
Миянинг иккинчи "потоги"ни очиб, эртанги иш режасини тузаман. Бунинг ҳаммаси автоматлаштирилган, "нагрузка" тушмасдан "перегрев"сиз ишлайди. Бу вазифаларнинг ҳаммаси алоҳида чип назоратида. Шу қобилият туфайли кўп вақтни тежайман.

Миямнинг яна бир ноёб хусусияти тўпланган маълумотларнинг кераксизларини тез ўчириш мумкинлиги. Масалан кераксиз маълумотларни алоҳида бир папкага йиғаманда DELETE тугмасини боссам бас, ярим соатда мия топ-тоза бўлади. Батамом ўчиб кетади, алдасам Эйфель минораси устимга қулаб тушсин.

Қулайликка қулай, лекин бир марта панд едим: яқинда уйландим, тўйдан сўнг ҳар ёнга санғишни бас қилай дедим-да, бўйдоқлик чоғимда орттирилган "подруга"ларимни бир папкага йиғиб "делейт"ладим. О,Господи!

Эътиборсизлик қилиб келинингизниям шу папкага қўшиб юборибман. Ҳеч нарсадан хабарим йўқ, ишдан келдимда тўғри ваннахонага ўтиб кетдим. Ювиниб бўлгач энди кийиниб бошлагандим, эшикни очиб бир қиз кириб:

- Қачон келдинг,- дейди. Тахта бўлиб қолдим. Ярмигача кийилган шимим тушиб кетди.

- К-кечирасиз синглим, с-с-сиз кимсиз, менинг уйимда нима қилиб юрибсиз, калитни ким берди? Уялмайсизми бегона эркакнинг олдига бостириб киришга?

Бақрайиб қолиш навбати қизга ўтди. Эсини йиғволгач:

- Шунчалигам молдек ичасанми,мен ҳали бегона бўп қолдимми?-деб йиғлаганча югуриб чиқиб кетди.

Кейинги ҳодисалар яшин тезлигида ривожланиб кетди. Скорый помощдан-да тез қайнотам, қайнонам, тўрт дона қайним етиб келди уйга. Бошланди қиёмат. Катта қайним сўяман деди, иккинчиси осаман деди, учинчиси мени олтинчи қаватдан ташлаб юбориш таклифини киритди. Кенжасиям четда қолмади.Уйни гранаталар портлаши, автоматлар тариллаши овози тутиб кетди. У жанжалдан фойдаланиб секингина қўшни хонага кириб Call of Duty 5 ни бошлаворибди. Қайнонам психбольницанинг телефонини интернетдан қидира бошлади. Қайнота менга тортган, оғирроқ , гап нимадалигини билди-да якуний хулосани чиқарди.

 Натижа шулки, менинг хотирам тиклангунча фото-видео муолажани ўз бўйнига олиб,  қайнонам бир ой бизникида яшади. Бу воқеа сабаб бўлиб, миямга яқинда "Корзина" ўрнатмоқчиман. Хотинимнинг айтишича бехосдан ўчирилган маълумотларни тикласа бўлармиш.

Лекин сизга айтмоқчи бўлганим умуман бошқа гап. Ортга , автобусда ўтириб янгиликларни ўқиётган жойга қайтамиз. Хуллас ҳам ўқияпман, ҳам миянинг иккинчи "потоги"да гадой топмас сайтдаги бу хабарни сизга етказиш режасини тузяпман. Уйга етгач чойгаям қарамасдан ўйлаганларимни қоғозга тушира бошладим. Марҳамат танишинг.

Қаланғи –қасанғи фирқаларга мурожаат ёки ким ҳақиқий мачо?


( Кеча мухалифатчи бўлган опай берган ҳангома )

-Ҳаммаёқ алғов- далғов бўлиб ётгани сабабми, ё яқинлашиб келаётган баҳор сабабми, ҳарҳолда менам уйда тинчгина урчуғимни йигириб ўтиролмадим. Қиши билан тезак-таппи ёқиб, свет йўқлиги бўлиб сериалларимни кўролмай асаблар қақшаб кетди, нимадир қилиб ўзимни ташвишлардан чалғитмоқчи бўлдим. Анчадан бери дугоналаримни кўрмадим, бир айланиб келсамми, ё куздан буён тўхтаб қолган гап-гаштакни давом эттирсаммикин? Ишқилиб нимадир қилишим керак, азалдан тиниб-тинчимасман, бир жойда узоқ ўтиролмайман. Тўсатдан ярқ этиб бошимга янги фикр келди.

Сўнгги вақтда мухолифат, диктатура, партия, революция деган гаплар урф бўлган, кўрмай юрган дугоналарим ёки емай юрган "гап"им бормиди, яхшиси бирор-бир партияга қўшилволаман, мендан нима кетди деб ўйладим. Шу "необычный"  вариантни танладим. Ёмғирдан сўнг болалаб кетган қўзиқориндек партия-мартия, ҳаракат-бебаракатларам кўп экан. Икки кун ўйлаб "Бирдумлик"га аъзо бўлиб ўтдим. Нима учун айнан "Бирдумлик" , нега "Пиртлик"мас, "Эркалар"мас ёки тинчгина "Легаллар"га қўшилмадим? Ҳозир сизга "Бирдумлар" партиясининг афзалликларини санаб бераман.

"Пиртлик"  бошида яхши эди, салобатли, вазмин, обрўли, ҳар кўрганимда юрагим жиз этиб қўярди. Лекин орадан мана, йигирма йилча вақт ўтди, у палакат пирқабошисини сал "кришаси" кетиброқ қолган назаримда. Гап сўзининг мазаси қочиб, алжираб қолган. Билмай салом бериб қолсанг итдек қопиб ,бўралаб сўккани сўккан. Гапнинг очиғи, қари от кўпкарига ярамайди дейишади. Айғирликни эплолмаяпти, олдига борсам :- юз грамм қуйиб берсанг, юзта анекдот айтиб бераман жоним деб турволади.

Мадаминов бошда менга ёқмаган, эркакмасакан, козеллик қилиб шеригини ташлаб кетди ва ўзига алоҳида дўкон очди. Натижада катта супермаркет ҳувиллаб қолди. Банкрот бўлиш арафасида жойни арендага берворишди, ҳозир "публичный дом"га айлантиришиб даромад қилишаётганмиш.

Такаббурлик қилиб очган дўкони кўп ишламади, ҳозир бошқа савдогарларнинг молини устига бир-икки сўм қўйиб сотиб юрибди. Буниси майли, чидаса бўларди, лекин уям қариди-да. Мен дунёга бир марта келаман,орзу ҳавасим бор, ўйнасам -кулсам дейман.Менга керакми гулдек умримни шу қари такалар орасида хазон қилиш.

Эшитдим, ҳамманинг оғзида дув –дув гап, нима эмиш, импотенцияни тиклаш учун яқинда шарқ табобати бўйича "ОҳоҲ"  деган муолажани бошлаганмиш. Ётиб қолгунча отиб қол дегандир -да,қурмағур.

Тинчгина "Легаллар"га қўшилиб олмоқчиям бўлиб, бир икки қатнадим.Ҳаммаси қўй экан, қаёққа бошласанг ортингдан индамай эргашади. Айтган гапингдан чиқмайди. Зерикдим улардан айланай, онда-сонда бир гапириб қолса уйқу босадиган бўлиб қолди. Ҳе ўлларинг латтага ўхшамай дедим. Аёлнинг кўнглини олишниям билмайсанлар, эркак дегани мундоғ гуриллаб ёниб, оташи билан сал куйдириб туриши керак-да, латтачайнар , ҳезалак экансан ҳамманг, рўмол ўраб иштон кийволинглар деб чиқиб кетдим.

Автобусда бехосдан "Бирдумлар"  билан танишиб қолдим.Гапларига маҳлиё бўлиб телефон рақамимни бердим денг. Тез-тез учрашиб турадиган бўлдик. У анавиларга қараганда кўркам, анча ёш , демак куч-қувватиям кўп. Тажрибали, тадбиркор ва жуда хушмуомала йигит. Йўқ жойдан турли туман усулларни ўйлаб топиб ҳар бирини ўз ўрнида қўллайди. Аёлга бундан ортиқ яна нима керак дедим-да , ўзимни шу кишига бағишладим. Айтишларича бир пайтлар Польшадаям шунақа қайноқ йигит бўлган экан. Доим ўқиб изланишдалиги сабаб, Европа-Осиё тажрибасини бирлаштириб ҳақиқий мачо бўлади. Польшаликни ярим йўлда қолдиради ҳали. Омон бўлсин баракак топгур, анча жон киритиб қўйди. Фурсатдан фойдаланиб барчангизни мендан ўрнак олишга чақираман. Келинглар, ажойиб йигит у, барчамизни таъминлайди.

-Опа, мухлисларимиз қўнғироқ қилиб, СМС йўллаб саволлар  беришяпти, уларни қизиқтирган саволларга ўз фикр ва мулоҳазаларингизни билдирсангиз.

-Бажонидил, опагинанг ўргилсин сендан, бежиримгина йигитча экансан. Ёшлигим эсга тушиб кетяпти сенга қарасам.

-Бир мухлисимиз айтишича у киши чет эл билан иш қилармиш, пулни улардан олармиш. Сизлар ўз ҳоҳишингиз биланмас, у киши берган 150 доллар эвазига бирга юрган экансизлар.Сизлардан тижорат мақсадида фойдаланаркан. Айтишича,бирингизни 15000 долларга Эмиратга сотганмиш.

-Бу укамиз саратонда бошяланг кетмон чопиб, васваса хасталигига дучор бўлган кўринади. Эшитишимча Салой аканинг учинчи хотини донғи чиққан табиб. Шу хотинга албатта вақт топиб учрасин. Арпабодиёнга Эфиопия янтоғини аралаштириб қайнатиб, дамлама қилиб ичса, дард берган шифосиниям беради, бир ойда кўрмагандек бўлиб кетади , худо ҳоҳласа.

-СМС орқали келган савол: у киши оддий тракторчи экан,таърифлаганингизча бормикин, товуқ сигирларидан ортармикин. Бунчаликмасдир, ишониш қийин дейилган.

-Бу энди кўз билан кўрганни кет бериб енгибди , дегандек гап. Шубҳаси бўлса келсин, кўрсин. Ўзим олдига олиб кириб таништириб қўяман. Икки соатда фикрини ўзгартириб,биз билан бир умрга қолиб кетади. Тракторчи бўлса нима қипти, астойдил, маромига етказиб ҳайдаяпти барака топгур. Шу  пайтгача ҳеч ким нолигани йўқ.

-Навбатдаги фикр эгаси у кишини яқиндан танийман деб ёзган: синглим, мен сиз мақтаётган акангиз билан Россияда шакаргуфторлик қилиб юрганман, сиз айтаётган хислатлар у кишида умуман йўқ.. Ҳечам сиз таърифлагандек эмас, доим "қовун"  тушириб юрарди.Умрингизни бекор ўтказмай, эсингиз борида этагингизни ёпинг.

-Мен у кишини идеальный эркак демаяпман, идеал одамнинг ўзи йўқ.. Шунча яшаган бўлсам, кўрмаганларимни у одам ортиғи билан кўрсатяпти. Ҳеч афсусланмайман, мингдан-минг розиман. Қолаверса, сиз ғийбат қилаётган бўлишингиз мумкин.Тулки баландда осилиб турган узумга бўйи етмасдан "пуф,сассиқ"  деган экан.

-Опажон,шу каби саволлар жуда кўп келган мухлислардан.Аммо эфир вақти чегаралангани учун суҳбатимизни якунласак.Насиб қилса сиз билан яна учрашамиз. Ташрифингиз учун раҳмат, саломат бўлинг.

www.zamondosh.com